போர் நெருக்கடியால் பெரிதும் பாதிக்கப்பட்டுள்ள காசா மக்களுக்கு ஆதரவளிக்கும் வகையில், வான்வழி மற்றும் கடல்வழி மூலமாக ஆயிரக்கணக்கான டன் நிவாரணப் பொருட்களை சவூதி அரேபியா தொடர்ந்து அனுப்பி வருகிறது. அத்துடன், சர்வதேச அமைப்புகளுடன் இணைந்து அவசர மனிதாபிமான திட்டங்களுக்கும் பெருமளவில் நிதியுதவி அளித்து, காசா மக்களின் துயரத்தைத் துடைக்கும் பணிகளில் தீவிரமாகச் செயல்பட்டு வருகிறது.

கிங் சல்மான் மனிதநேய உதவி மற்றும் நிவாரண மையம் (KSrelief) வெளியிட்டுள்ள தகவலின்படி, நடப்பு மாதத்தின் 14-ஆம் தேதி வரை காசாவில் சுமார் 83,195 உணவுத் தொகுப்புகள் விநியோகிக்கப்பட்டுள்ளன. இதன் மூலம் 499,170 பேர் பயனடைந்துள்ளனர். மேலும், பாதிக்கப்பட்ட குடும்பங்களின் உணவுப் பாதுகாப்பை உறுதி செய்யும் திட்டத்தின் கீழ், தேவைப்படும் மக்களுக்கு 2,595,548 சூடான உணவுப் பொட்டலங்கள் வழங்கப்பட்டுள்ளன.

ஜூன் 7, 2026 வரையிலான தரவுகளின்படி, சவூதி அரேபியாவிலிருந்து 84 நிவாரண விமானங்கள் மற்றும் 8 கப்பல்கள் மூலம் உதவிப் பொருட்கள் காசாவிற்கு அனுப்பி வைக்கப்பட்டுள்ளன. வான் மற்றும் கடல் மார்க்கமாக இதுவரை மொத்தம் 7,750.08 டன் எடையுள்ள மனிதாபிமான உதவிகள் காசாவைச் சென்றடைந்துள்ளன. இவற்றில் உணவு, மருத்துவம், தங்குமிட வசதிகள் மற்றும் பல்வேறு அத்தியாவசிய நிவாரணப் பொருட்கள் அடங்கும்.

இந்த மாபெரும் மனிதாபிமான உதவிகளில், சுகாதாரத் துறைக்கு வலுசேர்க்கும் வகையிலான 20 ஆம்புலன்ஸ்கள், வான்வழியாகப் பொருட்களைப் பாதுகாப்பாக விநியோகிக்க உதவும் 500 சிறப்பு உபகரணங்கள் மற்றும் 39,200 ஆயத்த உணவுகளும் (Ready-to-eat meals) அடங்கும் என்பது குறிப்பிடத்தக்கது.

நேரடி கள உதவிகள் ஒருபுறமிருக்க, சர்வதேச நிறுவனங்களுடன் இணைந்து மாபெரும் நிதியுதவித் திட்டங்களையும் சவூதி அரேபியா முன்னெடுத்துள்ளது. உணவு, குடிநீர், சுகாதாரம், ஊட்டச்சத்து குறைபாடு நீக்கம் மற்றும் சுற்றுச்சூழல் மேம்பாடு போன்ற அவசரத் தேவைகளுக்காக இந்த நிதி பகிர்ந்தளிக்கப்படுகிறது. இதற்காக ஐ.நா. பாலஸ்தீன அகதிகள் முகமைக்கு (UNRWA) 55 மில்லியன் டாலர்களும், உலக சுகாதார நிறுவனத்திற்கு (WHO) மற்றும் சர்வதேச செஞ்சிலுவைச் சங்கத்திற்கு (ICRC) தலா 10 மில்லியன் டாலர்களும், உலக உணவுத் திட்டத்திற்கு (WFP) 5 மில்லியன் டாலர்களும் வழங்கப்பட்டுள்ளன.

மேலும், யுனிசெஃப் (UNICEF) அமைப்புக்கு 4 மில்லியன் டாலர்கள், இஸ்லாமிய ஒத்துழைப்பு அமைப்புக்கு (OIC) 3.6 மில்லியன் டாலர்கள், ஐ.நா. மக்கள் தொகை நிதியத்திற்கு (UNFPA) 1.5 மில்லியன் டாலர்கள், ஐ.நா. அகதிகள் ஆணையத்திற்கு (UNHCR) 750,000 டாலர்கள் மற்றும் பாலஸ்தீன செம்பிறை சங்கத்திற்கு 500,000 டாலர்கள் என பல்வேறு அமைப்புகளுக்கும் சவூதி அரேபியா நிதியுதவி அளித்துள்ளது. நேரடியாக நிவாரணப் பொருட்களை வழங்குவது மற்றும் சர்வதேச அமைப்புகளின் ஊடாக அவசரத் திட்டங்களுக்கு நிதியளிப்பது என இருவேறு பாதைகளில் சவூதி அரேபியா வழங்கி வரும் இந்தத் தொடர் உதவிகள், காசா மக்கள் எதிர்கொண்டு வரும் சவால்களைச் சமாளிக்கவும் அவர்களின் அடிப்படைத் தேவைகளைப் பூர்த்தி செய்யவும் அரணாக விளங்குகின்றன.

وصول قافلة مساعدات إنسانية جديدة مقدمة من #مركز_الملك_سلمان_للإغاثة إلى قطاع #غزة تحمل على متنها سلالًا غذائية، وذلك ضمن الحملة الشعبية السعودية لإغاثة الشعب الفلسطيني pic.twitter.com/B8gu2k8tMP

— مركز الملك سلمان للإغاثة (@KSRelief) June 7, 2026