அமெரிக்கா மற்றும் ஈரானுக்கு இடையே பிராந்தியத்தின் பாதுகாப்பையும் நிலைத்தன்மையையும் மேம்படுத்தும் வகையிலான நிரந்தர அமைதி ஒப்பந்தம் ஏற்படுவதை சவூதி அரேபியா பெரிதும் எதிர்நோக்கியுள்ளதாக சவூதி பட்டத்து இளவரசரும், பிரதமருமான முகமது பின் சல்மான் தெரிவித்துள்ளார். பாகிஸ்தான் பிரதமர் முகமது ஷெஹ்பாஸ் ஷெரீப் உடனான தொலைபேசி உரையாடலின் போது அவர் இதனைத் தெரிவித்தார்.

பாகிஸ்தான் மேற்கொண்ட தீவிர மத்தியஸ்த முயற்சிகளின் விளைவாக, அமெரிக்கா மற்றும் ஈரானுக்கு இடையிலான ராணுவ நடவடிக்கைகளை முடிவுக்குக் கொண்டுவரும் வகையிலான ஒப்பந்தம் எட்டப்பட்டுள்ளதை சவூதி அரேபியா மனதார வரவேற்பதாக பட்டத்து இளவரசர் இந்த உரையாடலின் போது குறிப்பிட்டார். மேலும், ஈரானுடனான இனிவரும் பேச்சுவார்த்தைகளும் சுமுகமாக நடைபெறும் என பாகிஸ்தான் தரப்பில் நம்பிக்கை தெரிவிக்கப்பட்டுள்ளது.

அமெரிக்கா மற்றும் ஈரானுக்கு இடையே இந்த முக்கியத்துவம் வாய்ந்த புரிந்துணர்வு ஒப்பந்தம் எட்டப்படுவதற்கு சவூதி அரேபியா அளித்த தொடர் ஆதரவுக்கும், மேற்கொண்ட முயற்சிகளுக்கும் பாகிஸ்தான் பிரதமர் ஷெஹ்பாஸ் ஷெரீப் தனது மனமார்ந்த நன்றியையும் பாராட்டுக்களையும் பட்டத்து இளவரசருக்குத் தெரிவித்தார். இந்தத் தொலைபேசி உரையாடலின் போது இரு சகோதர நாடுகளுக்கு இடையிலான நட்புறவு மற்றும் கூட்டு ஒத்துழைப்பை மேலும் வலுப்படுத்துவதற்கான வழிமுறைகள் குறித்தும் இரு தலைவர்களும் விரிவாக ஆலோசித்தனர்.