இன்சா அல்லாஹ் எதிர் வரும் 19/09/2025 வெள்ளிக்கிழமை, சவூதி அரேபியாவில் உள்ள அனைத்து பள்ளிவாசல்களிலும், நாட்டின் பாதுகாப்பு, செழிப்பு,மக்கள் ஒற்றுமை ஆகியவற்றை மையமாகக் கொண்டு (குத்பா) சிறப்பு உரை நிகழ்த்தப்பட உள்ளது. அல்லாஹ் சவூதி அரேபியாவிற்கு அருளியுள்ள ஆசிர்வாதங்களை நினைவுகூரவும், நாட்டின் பாதுகாப்பைப் பேணுவது ஒரு பெரிய பொறுப்பு என்பதை மக்களுக்கு உணர்த்தவும், தேசப்பற்று, நாட்டுக்கு விசுவாசமாக இருப்பதன் முக்கியத்துவத்தை வலியுறுத்தவும் இந்த (குத்பா) உரை, வடிவமைக்கப்பட்டுள்ளது.

தேசப்பற்று: இஸ்லாத்தின் ஒரு அங்கம்:

தேசப்பற்று என்பது இஸ்லாத்தின் உயர்ந்த பண்புகளில் ஒன்றாகும். நபிகள் நாயகம் (ஸல்) அவர்கள் தங்கள் பிறந்த பூமியான மக்காவை நேசித்தார்கள். பாதுகாப்பான அமைதியான சூழல், நாட்டின் பொருளாதார செழிப்பு, மக்களின் ஒற்றுமை ஆகிய ஆசீர்வாதங்கள், அல்லாஹ்வினால் வழங்கப்பட்ட கொடைகளாகும். இவைகளைப் பாதுகாப்பது ஒவ்வொரு குடிமகனின் கடமையாகும்.

நாட்டின் பாதுகாப்பு ஒரு கூட்டுப் பொறுப்பு:

நாட்டின் பாதுகாப்பைப் பேணுவது என்பது அரசாங்கத்தின் அல்லது பாதுகாப்புப் படையினரின் பொறுப்பு மட்டுமல்ல, அது ஒவ்வொரு குடிமகனின் பொறுப்பும் கூட. நமது சமூகத்தில் பிளவு அல்லது குழப்பங்களை ஏற்படுத்தும் எந்தவொரு முயற்சியையும் நாம் அனைவரும் எதிர்க்க வேண்டும். நாட்டின் பாதுகாப்பு என்பது அதன் வளர்ச்சிக்கும், முன்னேற்றத்திற்கும் மிக முக்கியமான அடித்தளமாகும். ஒரு நாடு பாதுகாப்பாக இருக்கும்போதுதான் மக்கள் அச்சமின்றி வாழ முடியும்.

தேசத்திற்கு விசுவாசமாக இருத்தல்:

தேசத்திற்கு விசுவாசமாக இருத்தல், அதன் சட்டங்களுக்கு மதிப்பளித்தல், அதன் முன்னேற்றத்திற்கு பங்களித்தல் ஆகியவை ஒவ்வொரு குடிமகனின் கடமையாகும். இந்த (குத்பா) உரை மூலம், நாட்டு மக்கள் சவூதி அரேபியாவிற்கு விசுவாசமாகவும், அதன் வளர்ச்சிக்காக ஒன்றிணைந்து செயல்படுவோம் என உறுதிமொழி வழங்குவதே நோக்கமாகும்.