Admin
சவுதி அரேபியாவில் வெளிநாட்டு ஹஜ் பயணிகளுக்கு சேவை வழங்கும் அமைப்பில் முக்கிய திருத்தங்களுக்கு அந்நாட்டு அமைச்சரவை ஒப்புதல் அளித்துள்ளது. இந்த திருத்தத்தின்படி, 1440 ஆம் ஆண்டு முதல் நடைமுறையில் இருந்த “அர்பாப் அல்-தவாஇஃப் நிறுவனங்கள்” (شركات أرباب الطوائف) முழுமையாக ரத்து செய்யப்படுகின்றன.
அதற்குப் பதிலாக, “ஹஜ் விருந்தோம்பல் நிறுவனங்கள்” (شركات ضيافة الحجاج) என்ற புதிய அமைப்பு அறிமுகப்படுத்தப்பட்டுள்ளது.
புதிய அமைப்பின் முக்கிய அம்சங்கள்:
1. நான்கு வகை நிறுவனங்கள்: புதிய “ஹஜ் விருந்தோம்பல் நிறுவனங்கள்” நான்கு முக்கிய வகைகளாக பிரிக்கப்பட்டுள்ளன:
- மக்கா நகரம் மற்றும் புனிதத் தலங்களில் (மினா, அராஃபத், முஸ்தலிஃபா) ஹஜ் பயணிகளுக்கு சேவை வழங்கும் நிறுவனங்கள்.
- மக்கா நகரில் உள்ள தங்கும் இடங்களில் ஹஜ் பயணிகளுக்கு நீர் விநியோகம் (ஸிகாயா) செய்யும் நிறுவனம்.
- சவுதி அரேபியாவின் நுழைவாயில்களில் (விமான நிலையங்கள், துறைமுகங்கள்) ஹஜ் பயணிகளை வரவேற்பது, குழுக்களாகப் பிரிப்பது (தஃப்வீஜ்) மற்றும் அவர்கள் திரும்புவதற்கான ஏற்பாடுகளைச் செய்யும் நிறுவனம்.
- மதீனாவில் உள்ள மஸ்ஜிதுந் நபவிக்கு வரும் ஜியாரத் பயணிகளுக்கு சேவை செய்யும் நிறுவனம்.
2. சேவைகளில் கட்டுப்பாடு: மக்கா மற்றும் மதீனாவில் சேவை செய்ய உரிமம் பெற்ற முக்கிய விருந்தோம்பல் நிறுவனங்கள், ஹஜ் பயணிகளுக்கு நேரடியாக சேவை வழங்க முடியாது. அவர்கள், சேவைகளை வழங்குவதற்காக தனியான துணை நிறுவனங்களை உருவாக்க வேண்டும்.
இருப்பினும், நீர் விநியோகம் (ஸிகாயா) மற்றும் வரவேற்பு (தஃப்வீஜ்) நிறுவனங்கள் விரும்பினால், சேவைகளை வழங்க துணை நிறுவனங்களை உருவாக்கிக்கொள்ளலாம்.
3. சவுதி குடிமக்களுக்கு மட்டுமே உரிமை: இந்த புதிய திருத்தங்களின்படி, இனிமேல் புதிய ஹஜ் விருந்தோம்பல் நிறுவனங்களை உருவாக்க முடியாது என திட்டவட்டமாகத் தெரிவிக்கப்பட்டுள்ளது.
மேலும், தற்போதுள்ள மற்றும் உருவாக்கப்படும் அனைத்து ஹஜ் விருந்தோம்பல் நிறுவனங்களின் உரிமை மற்றும் மேலாண்மை சவுதி குடிமக்களுக்கு மட்டுமே என வரம்பிடப்பட்டுள்ளது. இந்த நிறுவனங்களின் பங்குகள் வாரிசுரிமைச் சட்டத்தின்படி கைமாறும் பட்சத்தில், வாரிசுதாரர்கள் சவுதி அல்லாதவர்களாக இருந்தால், அவர்கள் நிறுவனத்திலிருந்து வெளியேறுவது (பங்குகளை விற்பது) தொடர்பான விதிகள் பின்னர் அறிவிக்கப்படும்.
4. ஹஜ் பயணிகளுக்கான நேரடி ஒப்பந்தம்: ஹஜ் பயணிகள் அல்லது அவர்களின் பிரதிநிதிகள், சேவைகளைப் பெறுவதற்கு சேவை வழங்கும் நிறுவனங்களுடன் நேரடியாக ஒப்பந்தம் செய்து கொள்ள வேண்டும் என புதிய விதிமுறை வலியுறுத்துகிறது.
5. சவுதி ஊழியர்களுக்கு முன்னுரிமை: ஹஜ் விருந்தோம்பல் நிறுவனங்கள் மற்றும் சேவை நிறுவனங்களில் தகுதி வாய்ந்த சவுதி குடிமக்களின் பங்களிப்பை விரிவுபடுத்தவும், அவர்களுக்கு வேலைவாய்ப்பில் முன்னுரிமை அளிக்கவும் இந்த திருத்தம் வழிகோலுகிறது.
மீறுவோருக்குக் கடுமையான தண்டனைகள்:
இந்த புதிய விதிமுறைகளையோ அல்லது அதன் கீழ் பிறப்பிக்கப்படும் முடிவுகளையோ மீறும் நிறுவனங்கள் அல்லது அதன் ஊழியர்களுக்கு கடுமையான தண்டனைகள் விதிக்கப்படும் என எச்சரிக்கப்பட்டுள்ளது:
- நிறுவனங்களுக்கு: விதிமீறலில் ஈடுபடும் நிறுவனங்கள், 3 ஆண்டுகள் வரை ஹஜ் சேவைப் பணிகளைச் செய்ய தடை (இடைநிறுத்தம்) விதிக்கப்படும்.
- ஊழியர்கள் மற்றும் நிர்வாகம்: நிறுவனங்களின் இயக்குநர் குழு உறுப்பினர்கள் அல்லது ஊழியர்கள் தவறு செய்வது நிரூபிக்கப்பட்டால், அவர்கள் பதவியிலிருந்து நீக்கப்படுவார்கள். மேலும், அவர்கள் 5 ஆண்டுகள் வரை ஹஜ் சேவை தொடர்பான எந்தப் பணியிலும் ஈடுபடத் தடை விதிக்கப்படும்.
அமைச்சகத்திற்கு கூடுதல் அதிகாரம்: ஹஜ் பயணிகளுக்கான சேவைகள் தடையின்றி கிடைப்பதை உறுதிசெய்ய, ஹஜ் மற்றும் உம்ரா அமைச்சகத்திற்கு கூடுதல் அதிகாரங்கள் வழங்கப்பட்டுள்ளன. ஒரு நிறுவனம் தனது கடமைகளைச் சரிவரச் செய்யத் தவறினால், ஹஜ் பயணிகளின் நலன் கருதி, மற்றொரு உரிமம் பெற்ற நிறுவனத்தை அமைச்சகமே நியமிக்கலாம். அதற்கான முழுச் செலவையும் தவறிழைத்த நிறுவனத்திடமிருந்தே அமைச்சகம் திரும்பப் பெற்றுக் கொள்ளும்.
sauditamil
