Admin
யேமன், அஜர்பைஜான் மற்றும் ஈராக் ஆகிய நாடுகளில் கன்னிவெடிகளை (Landmines) அகற்றும் மாபெரும் மனிதாபிமானப் பணிகளுக்காகச் சவுதி அரேபியா இதுவரை 294 மில்லியன் அமெரிக்க டாலர்களுக்கும் மேல் செலவிட்டுள்ளதாகச் சவுதியின் ‘கிங் சல்மான் மனிதாபிமான மற்றும் நிவாரண மையம்’ (KSrelief) அதிகாரப்பூர்வமாக அறிவித்துள்ளது. பொதுமக்கள் பாதுகாப்பை உறுதி செய்யவும், போரால் பாதிக்கப்பட்ட மக்களின் துயரங்களைத் துடைக்கவும் சவுதி அரேபியா இத்தகைய தீவிர நடவடிக்கைகளை மேற்கொண்டு வருகிறது.
யேமனில் ‘மசாம்’ (Masam) திட்டத்தின் மாபெரும் சாதனை யேமனில் கண்மூடித்தனமாகப் புதைக்கப்பட்ட கன்னிவெடிகள், வெடிக்காத வெடிபொருட்கள் மற்றும் கையால் தயாரிக்கப்பட்ட வெடிகுண்டுகளை (IEDs) அகற்றுவதற்காகச் சவுதி அரேபியா ‘மசாம்’ என்ற சிறப்புத் திட்டத்தைச் செயல்படுத்தி வருகிறது. இதற்காக மட்டுமே சுமார் $290 மில்லியன் (290,161,890 டாலர்கள்) செலவிடப்பட்டுள்ளது.
ஜூன் 2018-ல் தொடங்கப்பட்ட இந்தத் திட்டத்தின் மூலம், இதுவரை 5,51,189 கன்னிவெடிகள் மற்றும் வெடிபொருட்கள் பாதுகாப்பாக அகற்றப்பட்டுள்ளன. இதன் மூலம் யேமனில் உள்ள கிராமங்கள், சாலைகள், விவசாய நிலங்கள் என சுமார் 7.7 கோடி சதுர மீட்டர் (77,994,540 Sq.m) நிலப்பரப்பு வெடிபொருள் அற்ற பாதுகாப்பான பூமியாக மாற்றப்பட்டுள்ளது. சர்வதேச நிபுணர்கள் உள்ளிட்ட 746 களப்பணியாளர்கள் இந்த அபாயகரமான பணியில் ஈடுபட்டுள்ளனர்.
ஈராக் மற்றும் அஜர்பைஜானில் நிதியுதவி யேமனைத் தொடர்ந்து, ஈராக் மற்றும் அஜர்பைஜான் நாடுகளிலும் கன்னிவெடிகளை அகற்றும் திட்டங்களுக்குச் சவுதி அரேபியா நிதியுதவி வழங்கி வருகிறது. ஈராக்கில் கன்னிவெடிகளைக் கணக்கெடுத்து அகற்றும் பணிகளுக்காக 1 மில்லியன் டாலர்களும், அஜர்பைஜானில் செயல்படுத்தப்படும் திட்டங்களுக்கு 3 மில்லியன் டாலர்களும் சவுதி நிவாரண மையத்தால் வழங்கப்பட்டுள்ளன.
பாதிக்கப்பட்டவர்களுக்கு மறுவாழ்வு கன்னிவெடிகளை அகற்றுவதோடு மட்டுமின்றி, அதனால் பாதிக்கப்பட்டு உடல் உறுப்புகளை இழந்தவர்களுக்கு மறுவாழ்வு அளிக்கும் திட்டத்தையும் சவுதி அரேபியா செயல்படுத்தி வருகிறது. அதிநவீனச் செயற்கை உறுப்புகளைப் பொருத்தி, அவர்கள் மீண்டும் இயல்பு வாழ்க்கைக்குத் திரும்பும் வகையில் இதுவரை சுமார் 92,000 பேருக்கு மருத்துவ உதவிகள் வழங்கப்பட்டுள்ளன.
“0% பிழை மட்டுமே அனுமதிக்கப்படும்” – ஆபத்தான பணி கன்னிவெடிகளை அகற்றும் பணியின் அபாயம் குறித்து ‘மசாம்’ திட்டத்தின் பொது மேலாளர் ஒசாமா அல்-கோசைபி கூறுகையில், “எங்கள் களப்பணியாளர்கள் தான் இத்திட்டத்தின் முதுகெலும்பு. வேலையைத் தொடங்கும் ஒவ்வொரு நாளும், அதுவே அவர்களின் கடைசி நாளாகக் கூட இருக்கலாம். குடும்பத்தினரிடம் விடைபெற்றுச் செல்லும் போது நாங்கள் திரும்பி வருவோமா என்பதே எங்களுக்குத் தெரியாது. இப்பணியில் தவறுகளுக்கான வாய்ப்பு ‘0%’ ஆக மட்டுமே இருக்க வேண்டும்; இல்லையெனில் நாங்களும் கன்னிவெடிக்கு பலியானவர்களின் பட்டியலில் இணைந்துவிடுவோம்” என நெகிழ்ச்சியோடு தெரிவித்தார்.
உலகளவில் கன்னிவெடிகள் மற்றும் வெடிக்காத வெடிபொருட்களால் ஒவ்வொரு மணி நேரத்திற்கும் ஒருவர் கொல்லப்படுகிறார் அல்லது காயமடைகிறார் என ஐக்கிய நாடுகள் சபை (UN) எச்சரித்துள்ள நிலையில், சவுதி அரேபியாவின் இந்த மனிதாபிமானப் பணி சர்வதேச அளவில் பெரும் பாராட்டுகளைப் பெற்றுள்ளது.
