தியாகத் திருநாளான ‘ஈத் அல்-அதா’வின் (Eid Al-Adha) அதிகாலைப் பொழுது முதல், புனித மக்கா பள்ளிவாசல் (Masjid Al-Haram) வளாகம் மற்றும் முற்றங்களில் லட்சக்கணக்கான ஹஜ் பயணிகள் ‘தவாஃப் அல்-இஃபாதா’ (Tawaf Al-Ifadah) கடமையை நிறைவேற்றுவதற்காகப் பக்திப் பெருக்கோடு குவிந்தனர். சவுதி அரசு வழங்கியிருந்த விரிவான ஏற்பாடுகள் மற்றும் பாதுகாப்பு அரணுக்கு மத்தியில், பயணிகள் மிகுந்த அமைதியுடனும் ஆன்மீக உணர்வுடனும் தங்களின் வழிபாடுகளை நிறைவேற்றினர்.

மினாவில் கல்லெறியும் கடமை (Jamarat Al-Aqaba): ஹஜ்ஜின் மிக முக்கியக் கடமையான அரஃபாத் பெருவெளியில் தங்கும் நிகழ்வை முடித்துவிட்டு, முஸ்தலிஃபாவில் (Muzdalifah) இரவைக் கழித்த பயணிகள் நேற்றிரவு நள்ளிரவு முதல் மினா (Mina) முகாமை நோக்கி நகரத் தொடங்கினர். அங்கு ஜமராத் அல்-அகபாவில் 7 கற்களை எறியும் கடமையை (Jamarat) முடித்த பிறகே அவர்கள் மக்கா பள்ளிவாசலுக்கு வருகை தந்தனர். கூட்ட நெரிசலைத் தவிர்க்கும் வகையில் சவுதி அரசு முன்கூட்டியே வகுத்திருந்த சிறப்பான திட்டமிடலால் பயணிகளின் இந்த நகர்வு மிக எளிமையாகவும் சீராகவும் அமைந்தது.

கிருமிநாசினி கொண்டு தொடர் தூய்மைப் பணிகள்: லட்சக்கணக்கான பயணிகள் வருகை தருவதை முன்னிட்டு, இரு புனிதத் தலங்களின் விவகாரங்களைக் கவனிப்பதற்கான பொது ஆணையம் பள்ளிவாசலின் தூய்மைப் பணிகளைத் தீவிரப்படுத்தியது. தவாஃப் செய்யும் இடம் (Mataf), நடைபாதைகள் மற்றும் வெளிப்புற முற்றங்கள் முழுவதும் அதிநவீன இயந்திரங்களைக் கொண்டு கிருமிநாசினி மூலம் தொடர்ந்து சுத்திகரிக்கப்பட்டன. பயணிகள் வருவதற்கு முன்பும், சென்ற பின்பும் இந்தப் பணிகள் தொய்வின்றி நடைபெற்றன. மேலும், பயணிகளின் நுழைவு மற்றும் வெளியேற்றப் பாதைகளைப் பாதுகாப்பு மற்றும் சுகாதாரத் துறையினரின் ஒருங்கிணைப்புடன் ஆணையம் மிகச் சிறப்பாக நிர்வகித்தது.

அதிநவீனக் குளிரூட்டும் அமைப்பு (Advanced Cooling System): சவுதியில் தற்போது நிலவும் அதிக வெப்பநிலைக்கு மத்தியில் ஹஜ் பயணிகள் சிரமமின்றித் தவாஃப் செய்வதற்காக, பள்ளிவாசல் முழுவதும் அதிநவீனக் குளிரூட்டும் அமைப்புகள் (Air conditioning systems) முழு வீச்சில் இயக்கப்பட்டன. தூய்மையான மற்றும் குளிர்ந்த காற்றை வழங்கும் இந்த அமைப்புகளுடன், வெளிப்புற முற்றங்கள் மற்றும் பள்ளிவாசலுக்கு வரும் சாலைகளிலும் குளிர்ந்த காற்றை வழங்கும் வசதிகள் ஏற்படுத்தப்பட்டிருந்தன.

ஹஜ் பயணிகளின் பாதுகாப்பையும் சௌகரியத்தையும் உறுதி செய்வதற்காகக் களப்பணியாளர்கள், பாதுகாப்புப் படையினர் மற்றும் மருத்துவக் குழுவினர் என அனைவரும் 24 மணி நேரமும் சேவையில் ஈடுபட்டுள்ளனர். மாபெரும் கூட்டத்தை நிர்வகிப்பதிலும், இறைவிசுவாசிகளுக்குச் சேவையாற்றுவதிலும் சவுதி அரேபியா பெற்றுள்ள ஈடு இணையற்ற அனுபவத்தையும் தயார்நிலையையும் இந்தச் சிறப்பான ஏற்பாடுகள் தெளிவாகப் பிரதிபலிக்கின்றன.