ஐக்கிய நாடுகள் பாதுகாப்புச் சபையில் நடைபெற்ற ‘ஆயுத மோதல்களும் சிறுவர்களும்’ தொடர்பான அமர்வில், காஸா சிறுவர்கள் எதிர்கொள்ளும் துயரங்களை சவுதி அரேபியா மிக வலுவாக முன்வைத்துள்ளது. போரின் கோரப்பிடியில் சிக்கியுள்ள சிறுவர்களைப் பாதுகாக்க அவசரமான சர்வதேசத் தலையீடு அவசியம் என சவுதி அரேபியா அறைகூவல் விடுத்துள்ளது.

சர்வதேச சட்டங்களின் அப்பட்டமான மீறல் காஸாவில் உள்ள சிறுவர்கள் தினசரி எதிர்கொள்ளும் கொடுமைகள், சர்வதேச மனிதாபிமான சட்டங்கள் மற்றும் மனித விழுமியங்களுக்கு எதிரான அப்பட்டமான மீறல் என சவுதி அரேபியா சுட்டிக்காட்டியுள்ளது. போரின் கொடூரமான பாதிப்புகளில் இருந்து பிஞ்சு குழந்தைகளைப் பாதுகாக்கவும், இந்த மனிதப் பேரவலத்தை உடனடியாக முடிவுக்குக் கொண்டுவரவும் சர்வதேச சமூகம் விழிப்படைந்து விரைவாகச் செயல்பட வேண்டிய தருணம் இதுவாகும்.

ஐ.நா.வுக்கான சவுதி அரேபியாவின் நிரந்தரப் பிரதிநிதி டாக்டர் அப்துல் அஸீஸ் அல்-வாசல் (Dr. Abdulaziz Al-Wasel) இந்த அமர்வில் உரையாற்றினார். ஆயுத மோதல்களில் சிக்கும் சிறுவர்களைப் பாதுகாப்பது என்பது எந்தவொரு தனித்த தரப்பின் கடமையும் அல்ல; அது அனைவரதும் கூட்டுப் பொறுப்பாகும் என்று அவர் தனது உரையில் ஆழமாகப் பதிவு செய்தார். மேலும், மோதல்களுக்கான அடிப்படை காரணங்களைக் கண்டறிந்து அவற்றைக் களைவதற்கும், போரின் பின்னடைவுகளைச் சீர்செய்வதற்கும் ஒருங்கிணைந்த முயற்சிகள் தேவை எனவும் அவர் வலியுறுத்தினார்.

பாகுபாடற்ற மனிதாபிமான மற்றும் நிவாரணப் பணிகள் பொதுமக்களையும், குறிப்பாக சிறுவர்களையும் பாதுகாக்கும் சர்வதேச முயற்சிகளுக்கு சவுதி அரேபியா தொடர்ந்து வழங்கி வரும் பங்களிப்பு குறித்தும் டாக்டர் அல்-வாசல் விளக்கினார்.

உலகளாவிய ரீதியில் ‘மன்னர் சல்மான் மனிதாபிமான உதவி மற்றும் நிவாரண மையத்தின்’ (KSRelief) ஊடாக, சுமார் 90-க்கும் மேற்பட்ட நாடுகளில் சவுதி அரேபியா நிவாரணத் திட்டங்களைச் செயல்படுத்தி வருகிறது. இனம், மதம், மொழி என எவ்வித பாகுபாடும் இன்றி, ஆயுத மோதல்கள் மற்றும் இயற்கைச் சீற்றங்களால் பாதிக்கப்பட்ட மக்களுக்கு இந்த மனிதாபிமான உதவிகள் சென்றடைவதை சவுதி அரேபியா உறுதி செய்துள்ளது.

இஸ்லாமிய விழுமியங்களின் அடிப்படையிலான அர்ப்பணிப்பு சிறுவர்களின் உரிமைகளுக்கும் அவர்களின் பாதுகாப்பிற்கும் இஸ்லாமிய ஷரீஆ மற்றும் அதன் விழுமியங்கள் அதிமுக்கியத்துவத்தை வழங்குகின்றன. இந்த உன்னதக் கோட்பாடுகளின் அடிப்படையில், சிறுவர்களைப் பாதுகாப்பதற்கும், மோதல்களால் கடுமையாகப் பாதிக்கப்பட்டுள்ள மக்களின் வாழ்வில் பாதுகாப்பையும், நிலைத்தன்மையையும் ஏற்படுத்துவதற்கும் முன்னெடுக்கப்படும் ஐக்கிய சபையின் அனைத்து நேர்மையான முயற்சிகளுக்கும் சவுதி அரேபியா எப்போதும் பக்கபலமாக நிற்கும் என டாக்டர் அல்-வாசல் மீண்டும் உறுதிபடத் தெரிவித்தார்.

ஆயுதங்களும் போர்களும் உலகை அச்சுறுத்தும் இக்காலத்தில், சிறுவர்களின் எதிர்காலத்தைப் பாதுகாப்பதில் உலக நாடுகள் ஒன்றிணைய வேண்டும் என்பதே சவுதி அரேபியாவின் இந்த உரையின் ஆழமான செய்தியாகும்.